ما لي سوا الموتر واطورق بالاشعار
واسري مع الصيهد بعيـد المسيـره
واناجي الرحمـن فـي مظلـم الغـار
في عالي الضلع الحمـر واستخيـره
وادعيه ياقاني عـن دروب الاخطـار
وارجيـه بحبوحـة نعيـم البريـره
ثلاث ساعـات الجبـل فيـه سهّـار
والليل يسري مـا بقـا الا قصيـره
يوم انطوا والنور مسفـر بالانظـار
هفيـت للـوادي عسـا فيـه خيـره
ابي الدفا من بين ذريـان الاشجـار
والا الحطـب فيـه الشلايـخ كثيـره
صليت ودالوب الهـوا بالحصـى دار
غربيتـن فـوق النثايـل ذريــره
مشيت لاقصى الضلع والقبلـه غبـار
ولقيـت مـذرا متّقـي فـي محيـره
شبيت ناري وارتخى العج مـا ثـار
والطيـر يلعـي بالعوالـي صفيـره
وارتاحت حسوسي على شبـة النـار
صحيح مـن قـال الطبيعـه بريـره
والملقمه فاحت مـع البـن مسمـار
والهيل بالرسـلان يقلـب خضيـره
زليتها والكيـف مشـروب الاخيـار
ينسـاق حوفـه للوجيـه السفيـره
يوم اضحى فيها الكون وازداد الاسفار
بغيت رزقـي قبـل وقـت الظهيـره
ما لي سوا صيد الخلا باقصى الاقفار
فيها الارانـب بالحصـى مستذيـره
اريـد لايـدام الغـدا دارجـن حـار
والقوقسـي راح وتطايـر صغـيـره
حتى الحجل في عالي الموحشه طـار
والحالـه بذيـك العوالـي طفـيـره
الا الخضاري ساكن لغوفـن عسـار
عديت صوبـه مـا بالاقفـار غيـره
لكنـي حسيـت بخرافيـش منخـار
بين الحصى شاهدت حاجـه مثيـره
لقيت حيـه طولهـا خمسـة اشبـار
يقرضها قنفذ مـا لهـا مـن فريـره
حقيقه الصحرا مـع اللـي بالابحـار
على الولـي ارزاقهـا مـع مصيـره
مضيت في حالي على صيدي امتـار
رميت بالبـارود الانثـى وعشيـره
غنمتهـا وابديـت بالقـول الاذكـار
رضينـا بـالارزاق نقبـل يسـيـره
تكيت يومي ما وطـا الضلـع ديّـار
ومشيت راجع بيـن حـزم وزبيـره
تحياتي
اختكم
مذهله
